تُونِي دِقَّتْ تمَطُّوتْ تْسَجَّلْ اِسْمَسْ اَمَزْرُوي نْالاِسْلَامْ سْوَنِ اتَخْدَمْ تَمَدُّورْتَسْ تُونِي دِقِتْ سِتْمَاطَاتْ نِغْزَرْ نَمْزَابْ اِسَبْلَنْتْ اِمَانَنْسَانتْ اِوَخْدَامْ نَالدِينْ .

مَامَا نسلِيمَانْ تَلُولَدْ اَسُقَسْ 1863م 1280ﻫ اَغَرْمْ نَتْغَرْدَايْتْ تَتَشَّردْ اَمَّاسْ نِقْتْ تَوَاشُولْتْ تَطَّفْ تِّصَرْتْ نُيُوشْ اَمَقْرَانْ تَطَّفْ الدِّينَسْ تـَبْدَى اَعْزَامَسْ اِغْرْبَازَنْ نْتَوَاتْ آلْ تَعْرَضْ القُرَانْ تَبِّي يَغْلَبْ نَالْعُلُومْ نَالشَّرِيعَتْ دَلْلُغَتْ دَالنَّحُو تَعْزَمْ المـُؤَلَّفَات نَالشِّيْخْ  طْفِيَّشْ دِلْقَنَاطِيرْ الْخَيرَاتْ دَالسِّيرَتْ نْوسَرْ نُيُوشْ اَمَقْرَانْ سُوفُوسْ نْمَنَاوْ اِنَعْزَمَانْ اِمَقْرَانَنْ آنْ الشِّيخْ بَابَكّرْ بَنْ مَسْعُودْ دَالشِّيخْ بُهُونْ بَنْ مُوسَى الشِّيخْ الحَاجْ بَكِيرْ بَنْ عُمَرْ دْمَنَّاوْ اِضِيضْنِينْ.

تَسَّقْضَعْ الْعُمُرَسْ اَمَّاسْ نْوَعْزَامْ دُوَلْمَادْ تَرْزَمْ تَدَّارْتَسْ اِوْسَلْمَادْ دُسَحْفَظْ نَالْقُرَانْ اِمَزَانَانْ دُسَلْمَدْ نَالْعَقِيدَة اَشْ اِسْبِي اَتْسَاجَّ مَنَّاوْ اِجْرَاوَنْ يَتْمَاطَّاتْ اَوَاعَظْ دُسَلْمَدْ نْسَنْتْ لُمُورْ نَالدِّينَنْسَانْتْ.

تُوتَفْ تَرْبَاعْتْ نْتِمْسِرِدِينْ تَغَرْدَايْتْ اَسُقَّسْ 1324ﻫ تَطَّفْ المَسْؤُولِيَةْ نْوَنْهَى فَالْمُنْكَرْ مْعَ تَحْسِيسْ لْلعَالَمْ نَتْسَادْنَانْ اِوِيُجورْ اَبْرِيدْ نُيُوشْ اَمَقْرَانْ مْعَ اَحَارَبْ نَالجْهَلْ دْقَاعْ اِبَسِّوَنْ اِلَّانْ تْخَالَافَانْ الدِّينْ دَالشَّرْعْ.  تَمْصْالَحْ جَارْ مِدَّانْ جَارْ تِوَاشُولِينْ تَدْوَلْدْ دِقَّتْ سْتِنَعْزَامِينْ تِزَعْلَاكْ اَغَرْمْ نَتْغَرْدَايْتْ اَتُّوشَوَارْ اَشْ تِتْشَّلْتْ فْمَنَّاوْ لُمُورْ نَالدُّنِّتْ دْالَاخْرَةْ  سَالْخِبْرَةْ اِتَّبِ تَمَدُّورْتَسْ مْعَ اَطَبَّقْ نْلَوَامَرْ نَتْمَجِّيدَا فْوَنِ اَعْنَانْ لَعْرَاسْ دْلَهْرَاجَاتْ اِضَرَّانْ اَغْلَانْ جَارْ تِسَادْنَانْ.
 تُّوغِ تَّشْلَانْ غَفْسْ دِكُلْ بَيَلَّا شْرَى دَالْواَسِطَةْ جَارْ اِعَزَّبَنْ دَلْمُجْتَمَعْ نَتْمَاطَّاتْ اَمُّونِي سُومْعَاوَنْ يَدْ مَنَّاوْ تْنَمِّرِينْ تِضِضَنْتِينْ اِسَبْلَنْتْ اِمَانَنْسَنْتْ اِوَخَدَامْ نَالدِّينْ دَالُّامَّةْ.
يَنَادِيسْ الشيخ ابراهيم القاريدي اِقْتْ سْتِكِرْدَاوْنَسْ: " تَجْبَى مَامَا نَسليمان فِقْنْ وَجْرَاوْ اَيْزَعْلَكْ نَتْسَدْنَانْ اَمْفَهَامَنْتْ دِيسْ اَبَدِّي دُوعَاوَنْ نِمْجَاهْدَنْ ضِدْ فْرَنْسَا مَعَ اَقَاطَعْ قَاعْ السْلَاعِي نَفْرَنْسَا مَعَ اَعَاقَبْ اَشْ حَدْ اِيخَالَفْ لْوَامَرْ نَتْمَجِّيدَا اَمُونِي سُوَكْلِيسْ الْبَرَاءَتْ نِمْسَلْمَنْ. وَنِّي دِقْنْ سَالْمَوَاقِفْ نْمَامَا نَسليمان تَمَدُّورْتَسْ  ضِدْ الاستعمار.

اَمَاشِي اِتَجُّو قَاعْ لَكْتُوبَسْ دْوَنِي تَكْسَبْ لَحْبُوسْ بَاشْ اَدِسْتَنْفَعْ سِّيسْ حَدْ وَضِيضَنْ تَرْنِي تَوَاصَّى بَعْدْ تَمَاتَانْتَسْ اَسْغَى نِقْتْ تَدَّارْتْ اَمَّاسْ نُوغَرْمْ تْسَبَّلْتْ دَلحْبُوسْ اِتْمَجِّيدَا اِيوَعْزَامْ دُسَلْمَدْ دُولْمَادْ دِكِتْ الصَّدَقَتْ جَارِية اَتَّقِيَّمْ تْخَدَّمْ غَفْسْ آلَ اَقْدَى نَالدُّنِيتْ اِوِيْتْ يُوشْ اَمَقْرَانْ دَالاَمَانَتْ اَسَّنِ 29 دِرَمَضَانْ اَسُقَاسْ 1349ﻫ/1931م اَمُونِي  بَعْدْ اَتَعْزَمْ الْخُطْبَتْ نَالْعِيدْ اَسَنِّ اَمَزْوارْ نْشَوَّالْ.

ماما نسليمان دِيكَّنْ المثال نْمَنَاوْتْ تْسَادْنَانْ تِضِيضْنْتِينْ اِلاَنَتْ غَالَ اِمَارُوا اَغْلاَنْ تْعَافَرَنْتْ دْجَاهَدَنْتْ اِوْسِوَضْ نَالْعِلْمْ دَالدِّينْ بِالْخُصُوصُ اَمَّاسْ نَتْسَادْنَانْ اِلاَّنَتْ لاَشْ غَرْسَنْتْ اَنْشَانْ اَنُوَرْجَازْ اَغْلاَنْ.

بقلم: الشيخ باعلي واعمر تغردايت.