... أسڤاسنْوَمْ دامبارش! أدييلي يسْبَمْبَش أزڤاغ أن تسْلَت، مِي تسْني سوزَڤاغ !

- يوتَفْد يور نْ يَنّار، نّغ نْ يِنّاير، أسّ أمزْوار ن جانفي. 

- سْ ييلَس ن تومْزابت، نّغ ن تْمازيغْت، يَنّار: أين دْ جانفي، لاش ؤجار! أماغَر أيسْنين دَاسيضَنْ سويُورْ ن تْفُويْت، مانش ئنسّن .

- أماغر، يلاّ أسيضَن، أحساب، سِيّارَن ن تفُويْت. يلا أسيضَن سيّارن نُويور، أنْ ؤُزومي، دْ وَايْنيز (الحج).

- أنا : ينار، ديسْ سَنّت توالين ڤّيُنَتْ : يَنّاي : داجديد ، سّيس أنا: فْلانا تسْنيْ، تيرض ئسمّورا دِ يْجدِيدَن .

- ديس يور: يور أجْديد. أنّغ أسڤّاسْ أجديد، سْتَنڤليزيتْ"new year" نيُو يير: السنة الجديدة .

- أنّسّن بلّي دْ يُوش أمُقران، اغنّسّلمَدَ ئلْسوَنَنّغ، وِيجي نشنين ئدْنَسّلفاتنْد .

- نّيغ، بلّي يورْ ن يَنّار، آن أيولو ن ئيّارن نوسڤّاس، نَتّان بَدّانْ أسْ: واحد، le premier

- أما نَشنين نقّار، نَسخَرْويش بلّي "ينار" ئلاّن، أفسوس د جانفي، سْ "تْلاتينيت" نقّار: بلّي ئنتّو ئبدّا أسّن 6 (أسّن سزّ) . دي جانفي؟ هـــامي ئيارن غادّاسن دفرس: فورار( فخم) دْ مَارس، " février " دْ "mars " نتّان بدّان أسّن واحد ؟ نّغ يور "ينّار" ديس غي 24 دوسان ؟ مايتلاّ تايتينّغ ؟ مايلا الْعَقلَنّغ ؟! .

- نشنين ، دْ لَقباط ن مَصَر، دْ الكنايس الارثودوكس ن تْمَا تاشرقيت، نْ والاّي ن تفُويْت ، اينُولُو غرنغ ينّار، ئنتّا أسْ ن 6 دجانفي، أمَا حَدْويضيضَن يتادجّا تْفاسكَا نُومَزوار ن ينّار : أس ن 12 دِ جانفي ؟! .

- أما نتّا ، أيولْون أدَجّنْ تفاسْكا ن ْ "ينّار"، آن تنّي ن جانفي أس ن واحد د جانفي !. 

- ديوش أمْقران ئدّسّلفان : يُورْ ، دْ تْفُويت ، دْ تمورط ، د ئجنْوان، د يسَڤّاسَنْ ئنَسّاضان سّيسَن ، ئنحَسّبْ سّيسَن ، يَدجّو ئيلا : مْراوْ دْ سَنّ ، 12 نِييّارن نوسڤّاس ، أدنتان : أس ن واحد جانفي ، نّغ دْ واحد يَنّار ، أدقدَان اسْ ن ْ 31 ديسَامبَر ، دْ 31 ديجانبر . ميمي؟ أماغر : أين داسْ ئدّيلول ديس عيسى ن مريما ، أمَزّانَسْ .

- ميمي انّسخَرْوشْ ؟ نَدجّ ألاَلِيسْ أسّن ن 24 ديسامبر ؟ نّغ أس ن 6 ، نّغ 12 جانفي ؟ غَل مَاني أوَن تْغنديف ؟!.

- سْوامّن ينايانغ أجلّيد امقران اضليسس ﴿ دَخْ نَدجّو ممّيس ن مريما دْمامّاسْ دازمول﴾ ﴿ .. و جعلنا ابن مريم و أمّه ءايةً ... ﴾

- سوامّن - دَخْ – أن مانَش ئنّيغ، يدجّو أيولون ميدّن ئلاّن فؤودم نَ تْمُورط سّاضانَن حَسْبَن سُولاليس.

- أسّو ،غرس 2016 نيسڤّاسن ، سي ئدّيلول . ئزيغ ، ولْنسخرويشْ أنّيني : ئلولد أسن 6 ، نغ 12 جانفي ، انغ ؤلا بلّي ئلولَد : 24 ديجامبر . ولنتّيلي ديد الْبَاصْ !! دْ وانّي ينّا ؤمزوار ، ينّات ؤمجّارو !! 

- أن خمّم، نَسمَضرن، دَاوحْدي ! دسّات ماغانيني ئدْشرا لاش سّيسن! ولْيڤمين ؤلا أتْوانان! مايلاّ العقلنّغ؟ مايْتَلاّ تايتّينّغ؟

- دسات ، ماغادقْديغ أوال ف "يَنّار"، أدِينيغْ هامي نسْخرويش ، لانشنين لاأتْوامان؟

- نتادجّا بلّي أسَر نُويوش، "عيسى ن مريما" ( أزول غفس ، ديمازّانن ) ئلولد 24 ديسامبر ؟

نغ ئلولد أس نْ 6 ؟ نّغ 12 جانفي؟؟ أمَا داآجلّيد أمقران ئسْنَن تُوفّيرتْ: -الغيب- يّدجو بلّي ئلولد أسّن 1 جانفي ، أسن واحد ينار. يَدجّ أسيضَنْ ن أيولون ميدّن فْؤودم ن تمورت سّاضانَنْ، حَسبَن، سي واسّنّي ئدّلول ديس. داجلّيد أمقران نّتا ئدجّين أمّو، أي تْموقردْ أيوش!!

- هامي؟ أماغر ؤدايَن تّادجّان، سّاضانن، حسبن، ئلان ن وّمْدان، نْ بنَادم، أس ئِيُوري ديسْ، ؤهو أس ئدّلول ديس.

- شتاين اتوامان انّان، بلّي ئلولدْ أسْ ن24 ديجامبر، يُوري أس ن واحد جانفي ؟ 

- أما نشنين ندجّو بلّي ئلولد أس ن 1 د جانفي، يوري أس ن 6 ، نيلي انبدّا أسيضن أس ن 6 . نشنين دلقباط، د الكنايس تيشرقين، ن ولاي ن تفويت – ان مانش ئنّيغ. 

- أمادينيني ئنّانْ ئلولد أسْنْ 12 نّان : أنخالف ئمشرْكن ! نان رْنين 11 ن ووسان ، ئلاّنْ جار أسوڤّاس ن تفويت، 365 يوم، دوسَڤّاس نويور 354 يوم (11يوم)

- ئڤ ؤسخّروَشْ دازعلوك !! 

- أسَنّينِيغْ ئميدنو: هامي ولنتّجّي يور ن فورار، د ونّي ن ئبرير، دوَني ن يولْيوز ... بدّان نتّان ؤلا نّتنين أس ن6 نغ ن 12 ؟؟ نّغْ ، يور ن ينار ديس : 24 يوم نغ 18 يوم . ؤوبَرْك !! مايلاّ العقلنّغ؟ مايتلا تايتّينغ؟ 

- أما دينينّي ئدجّين، اسوڤّاس ن يمازيغن ئنَتّا ، ئبَدّا. 950 ن ئسڤّاسَن، دسّات أسڤّاس ئيَجّو ؤجليد أمقران : أسّن ئدّيلول ديس أسرَسْ : 1جانفي . ئينيني، لاش غرسن، ؤلا زاف ن تايتّي ! لاش سوامّو دَارْني، تّيسَرشَاسْ ، فُومَزْرُويْ ،- ف التّاريخ- .

- باتّا أغَنّيوين غل "شاشنَاق" نغ ميسْمَس؟ دوَرْناس ن فرعون ؟ أدَهْوان تيرست تادَرْغالْت، أيَسْنين !

- أويسّن أرْنايُو ، يَضْرا تّاجرست؟ نّغ دانفدو ؟؟ أن ديما أنّي ينّا ؤمزوار ينّات ؤمجّارو !! 

- ئزيغ ! أشْ ئڤّن ميدّن ، أدّسّلفان أسڤّاس ئمانَنْسن ! لالمامان ، فرنسا ، الطلْيان ، روسيا ، مريكان ، لهنودا ، الشنوا ، دْغيرَسن ... دْغيرَسن ....

منقول بتصرف عن الأستاذ: عبد الرحمن حواش ، موقع: آت مزاب